ភ្នំពេញ​៖​ កាលពី​ថ្ងៃ​ពុធ​ ១​កើត​ ខែ​ពិសាខ​ ឆ្នាំជូត​ ទោស័ក​ ព​.​ស​.២៥៦៣​ ត្រូវ​នឹង​ថ្ងៃ​ទី​២២​ ខែមេសា​ ឆ្នាំ​២០២០​ នៅ​ទីស្ដីការក្រសួង​ ឯកឧត្តម​ ស៊ុន​ ចាន់​ថុ​ល​ ទេស​រដ្ឋមន្ត្រី​ រដ្ឋមន្ត្រីក្រសួង​សាធារណការ​ និង​ដឹក​ជញ្ជូន​ បាន​អញ្ជើញ​ដឹកនាំ​ក្រុមការងារ​ចុះ​ត្រួតពិនិត្យ​ដោយ​មិន​ជូនដំណឹង​ទុក​មុន​ នូវ​ការ​អនុវត្ត​ការ​សាងសង់​ធ្វើ​ឱ្យ​ប្រសើរ​ឡើង​ នូវ​កំណាត់​ ផ្លូវជាតិ​លេខ​២​ ផ្លូវជាតិ​លេខ​២២​ ផ្លូវជាតិ​លេខ​៣​។​

​ការ​ចុះ​ត្រួតពិនិត្យ​នេះ​គឺ​ដើម្បី​ ពិនិត្យ​ឱ្យ​ឃើញជាក់ស្តែង​នូវ​ស្ថានភាព​នៃ​ការ​អនុវត្ត​គ្រោង​ធ្វើ​ឱ្យ​ប្រសើរ​ឡើង​នូវ​កំណាត់​ផ្លូវ​ទាំង​បី​ខ្សែ​ខាងលើ​ ក៏​ដូច​ជា​ដាស់​ស្មារតី​ឱ្យ​គ្រប់​ភាគី​ពាក់ព័ន្ធ​ខិតខំ​បំពេញការងារ​ កសាង​ហេដ្ឋារចនាសម្ព័ន្ធ​ដឹក​ជញ្ជូន​ ឱ្យ​កាន់តែ​មាន​ភាព​ប្រសើរ​ឡើង​សម្រាប់​បម្រើ​ឱ្យ​សេដ្ឋកិច្ច​សង្គម​ជាតិ​កម្ពុជា​។​

​សូម​បញ្ជាក់​ជូន​ថា​៖​ គម្រោង​ធ្វើ​ឱ្យ​ប្រសើរ​ឡើង​វិញ​កំណាត់​ផ្លូវជាតិ​លេខ​២​ និង​ផ្លូវជាតិ​លេខ​២២​ មាន​ប្រវែង​សរុប​ ៧២,១៧​គីឡូម៉ែត្រ​ ដែល​ក្នុង​នោះ​កំណាត់​ផ្លូវជាតិ​លេខ​២​ ចាប់ពី​រង្វង់​មូល​តា​ខ្មៅ​ ដល់​អូរ​ចំបក់​ មាន​ប្រវែង​ ៦២,៥៦​គីឡូម៉ែត្រ​ និង​ផ្លូវជាតិ​លេខ​២២​ ពី​អូរ​ចំបក់​ ដល់​អង្គតាសោម​ មាន​ប្រវែង​ ៩,៦១​គីឡូម៉ែត្រ​ ស្ថិត​ក្នុងភូមិ​សាស្ត្រ​ ខេត្តតាកែវ​ ជា​ប្រភេទ​ផ្លូវ​ក្រាល​បេតុង​កៅស៊ូ​ AC​។​ កំណាត់​ផ្លូវ​ទាំង​ពីរ​ខ្សែ​នេះ​សាងសង់​ឡើង​ដោយ​ក្រុមហ៊ុន​ Hasan​ Engineering​ &​ Constructions​ Co.,​ Ltd​ និង​ត្រួតពិនិត្យ​បច្ចេកទេស​សាងសង់​ដោយ​សម្ព័ន្ធ​ក្រុមហ៊ុន​ Dasan​ Constructions​ Co.,​ Ltd,​ Dong​ II​ Engineering​ Consultants​ Co.,​ Ltd​ និង​ Seoyoung​ Engineering​ Co.,​ Ltd​ Join​ Venture​ គ្រោង​ចំណាយ​រយៈពេល​សាងសង់​ ចំនួន​៣០​ខែ​ គិត​ចាប់ពី​ខែតុលា​ ឆ្នាំ​២០១៩​ ដល់​ខែមេសា​ ឆ្នាំ​២០២២​។​

​ចំណែកឯ​ ផ្លូវជាតិ​លេខ​៣​ (​ភ្នំពេញ​-​កំពត​)​ មាន​ប្រវែង​ ១៣៤,៨២៦​គីឡូម៉ែត្រ​ បាន​បើក​ការដ្ឋាន​សាងសង់​នៅ​ថ្ងៃ​ទី​១៧​ ខែតុលា​ ឆ្នាំ​២០១៨​ និង​គ្រោង​បញ្ចប់​នៅ​ថ្ងៃ​ទី​១៦​ ខែតុលា​ ឆ្នាំ​២០២២​ ដោយ​ប្រើ​រយៈពេល​ ៤៨​ខែ​ សាងសង់​ដោយ​ក្រុមហ៊ុន​ China​ Road​ and​ Bridge​ Corporation​ និង​ត្រួតពិនិត្យ​បច្ចេកទេស​ដោយ​ក្រុមហ៊ុន​ Guangzhou​ Wanan​ Construction​ Supervision​ Co.,​ Ltd៕

​